|
|
|
Le acque di Pola Nella quale Bortolo narra come i Bùnicich costruirono fiorino dopo fiorino, la loro fortuna cominciando dalle accorte parsimonie di Capitan Nicolò che aveva le sue buone ragioni nel preferire Pola a Trieste per i rifornimenti idrici dell'Almissa. — Una volta iera tuto un altra concezion de la vita: grandi miserie e grandi richezze, siora Nina. Dopo, tuto se regola. Vardé per esempio i Bùnicich, cossa che no ve iera una volta! Lori gaveva casa in riva, lori gaveva casa su a Ciunski, lori gaveva comprado dei Colombis la vila per la càzia a Plauno, e squero — che quel, devo dir, che i me la ga fata sporca, perché mio sàntolo Toni defonto gaveva sempre dito che doveva esser anche mio el squero — e barche proprie, e carati in barche de altri, e torcio, e mezza Cherso iera de lori co' xe falido el vecio Mòise. Brava gente, quel bisogna dir, perché anca adesso lori fora ga posti bonissimi, dapertuto, che Nicoleto Bùnicich a Névìork, i me ga contado che xe un dei più grandi de Agenzia Maritima. Ma qua adesso dopo che xe morto el povero Antonio no xe più nissun e xe tuto in man dei altri. Quela volta el sparagno, esser interesso si gaveva un scopo. Perché lori, i Bùnicich, no so se vù ve ricordé, i gaveva cominciado propio del gnente. — Eh, ma anche in antico, lori i iera sempre signoreti. — Signoreti! Cossa ve iera per esempio Nicolò, che vigniva a star el bisnono de Nicoleto Bùnicich, che ve disevo prima? Lui ve iera un semplice Capitano maritimo. Dopo i se ga fato la prima barca, ma prima, Nicolò Bùnicich, che iera el più grando dei fradei, iera semplice Capitano maritimo, che anzi i contava che i sui veci gaveva fato assai sacrifizi per farghe far le Nautiche a Lussin. Ben, mi me lo ricordo, che iero giovinoto, lui ve iera semplice Capitano maritimo sul Lloyd Austriaco.L' «Almissa». — El stava in Almissa? — Ma cossa el stava in Almissa? I ghe gaveva dà l'«Almissa» che iera una picola barca del Lloyd Austriaco e se fazeva i viagi de Trieste fina le Boche de Cataro. Linia de Dalmazia po', semplice Capitano maritimo. Eco, vedè, quel iera un ano che vardava el soldo. Tuti i Bùnicich, eh, vardava el soldo: i contava che a casa de lori, se i gaveva un a pranzo — che za quela volta i stava ben — el vecio Nicolò ghe diseva se iera, metemo, gnochi de patate: «Ciolé, ciolé ancora, ciolé de più, ciolé due!» — Ghe piaseva gnochi? — Ma cossa importa se ghe piaseva o no ghe piaseva gnochi, a tuti ghe piasi gnochi. Iera per dir el temperamento dela persona. E sua moglie po' siora Cheti? Pensé che un giorno, al fio Antonio che sarìa sta el nono de quel Nicoleto che ve disevo prima, la ghe gaveva fato un ovo sbatudo col zuchero e dopo la ghe voleva meter un dito de rum drento e la ga sbalià butilia, e sto picolo — sior Antonio, ma picolo el iera quela volta — el vedeva che sto rum vigniva zò massa pian e el ghe ga dito: «Ma, mama, questo ve xe oio, no ve xe rum!» «Ah, ma no fa gnente — ga dito ela — magna istesso che xe oio de Cherso». E magnarlo el ga dovesto per no butar via. E dir che meza Cherso iera sua, dopo che iera falido el vecio Mòise. — Come? Ovo sbatudo col zuchero e oio? — Sicuro. No bisognava butar via gnente quela volta, cussì se se fazeva i soldi. Soldin su soldin se fa el fìorin, diseva el vecio Bùnicich. Epur, vedè, Nicolò co' ga cominciado iera semplice Capitano maritimo sul'«Almissa», che quando i me ga imbarcà a mi, Barba Nane ga dito: «Va, va sul«Almissa», che col Comandante Bùnicich te se imparerà a scortigar el pedocio per conzarghe la pele e cussì, co' i te caverà la matricola, ti gaverà un mistier in man!» — Sì, ma anca Barba Nane iera interessoso! — Ma in un altro modo: Barba Nane iera anca grandioso qualche volta. Savé chi che gaveva fato el salìso novo del Domo? — El Fassio.. — Maché el Fassio! Barba Nane lo gaveva fato, lui iera assai divoto. Ma indiferente: ve contavo che viagiavimo col'«Almissa» col Comandante Bùnicich. Mi iero giovinoto e con noi iera Marco Mitis, gnanca dir, che noi due ierimo inseparabili, el nostro-omo Pìllepich e Cuntento che iera giovine de coverta. Giovinoto propio el iera: savé quel Cuntento de Valon che ve contavo tante volte? No el se ciamava Cuntento, ma nualtri ghe disevimo cussi, perché lui, povero, de Valon che el iera, le prime volte che el navigava e el ve deva un poco de mondo, el diseva sempre: «Ah, mi son cuntento». Cuntento, po'. No el iera sempio, savé, el iera un poco indrio come mentalità, ma no sempio. El gaveva fato anche scole, el saveva leger, che no iera fazile quela volta intivar un de bassa forza che savessi leger. — Ah, el legeva? — El legeva! Cossa volé che el legessi a bordo? «Almissa» che iera scrito de pupavia sula barca? Disevo per dir che no el iera pretamente ignorante. — Ah! El gaveva studiado nela scola del'Italia Redenta? — Ma ché Italia Redenta, che quela volta chi se sognava del'Italia redenta! Parlo de prima dela Prima guera, co' fazevimo i viagi col «Almissa» per Dalmazia e el vecio Nicolò Bùnicich iera semplice Capitano maritimo. Ben, el ve iera interessoso sula provianda che no ve digo, lui solo si stesso fazeva la spesa, fazeva tuto. Pensévese, presempio, che una volta a Sebenico che lui ga trovà una letera cola multa, perché i gaveva sbaliado de meter la marca, lui ga ricusado de ciorla. Che po' inveze iera, se ga savesto dopo, che i ghe diseva che sua madre, che stava za mal de ani, la iera propio a lultimo stadio. Difati a Spalatro el ga trovà lassà dito in Governo Maritimo che la ghe iera morta. — Eh, qualche volta xe meio che Dio cioghi. — Indiferente. Volevo contarve che lui xe andado in Posta a Spalatro a bater telegrama, i contava. El ga scrito: «Straziato dolore torno subito.» E che l'impiegato dela Posta ghe ga dito che per tarifa minima el podeva meter ancora due parole. E alora lui ga zontà, tuto pianzendo, «Distinti saluti». Insoma, una volta che ve contavo, partimo de Trieste con sta «Almissa» per la linia de Dalmazia che se fazeva, e el ghe disi al nostro-omo Pìllepich che semo lesti e che molemo le zime. «Come — ghe disi el nostro-omo Pìllepich — semo lesti, che no gavemo fato acqua?» E lui, che lu no stia pensar e che una roba e l'altra, che co' lui ghe disi de molar le zime, se mola le zime. — No el voleva acqua? — Cossa no el voleva acqua? Come se pol star a bordo senza acqua dolze? Iera inveze, savé cossa? Iera che fazendo acqua a Trieste, co' i tacava la màniga bisognava pagar el disagio. — Come el disagio? — Sì el disagio, cussì se diseva quela volta in Marina Mercantile la spetanza del lavor de meter la màniga, de pompar l'acqua. El disagio po'. E inveze lui, una volta che ghe iera tocado de restar senza acqua fora de Pola e el xe andado a far acqua a Pola, che iera Porto Militar dela Marina Austro-Ungarica, el va a far acqua, i ghe meti la màniga e tuto, e el osserva che no i ghe fa pagar el disagio. Perché a Pola, capì, come Porto Militar fazeva tuto el lavor el militar e no se podeva pagar el militar soto l'Austria. E cussì no se pagava el disagio, che po', siora Nina, 'sto disagio ve iera un diese fiorini, gnanca. Che per una barca diese fiorini no iera gnente, ma lui diseva sempre: diese fiorini xe diese fiorini. E cussì lui, dopo de quela volta, più de una volta — no sempre per no dar nel ocio — inveze de far acqua a Trieste e pagar el disagio, el fazeva acqua a Pola gratis et amoris. «Tanto — el diseva — la Marina de Guera, co' no xe guera, xe solo che per intrigo». — Eh, ma co' xe guera xe bruto. — Ma no iera guera, ve go dito, ve go dito che ve parlo de prima dela Prima guera. Però iera Marina de guera a Pola. Savé, quela volta ve iera la «Viribus Unitis», la «Santo Stefano» che bateva bandiera del Amiraglio Horthy, el «Karl Sesto», el «Prinz Eugen», la «Kaiserin Elisabeth», tuto a Pola iera. Un poco a Pola e un poco a Cataro. Anche a Cataro el fazeva acqua qualche volta. Insoma che ve conto: andemo dentro de Pola per far acqua e ve vedemo tuta la Flota Austro-Ungarica, mi calcolo, in formazion de fila, come che se diseva in alora, dentro del porto, coi pavesi tiradi su, e sule naviscuola a vela, i cadeti rampigai sui trincheti, sui parocheti, sule mezane, sule sàrtighe, in parada insoma. Parada militar, perché iera rivado l'Arciduca Francesco Ferdinando e iera parada. — A Pola? — No a Sànsego, coi sansegoti che magnava fighi sul molo. Ma se ve go dito che ierimo a Pola! E che iera la parada militar de tuta la Flota Austro-Ungarica in porto de Pola. E Bùnicich, gnente, lui drito avanti, el disi: «Adesso andemo a far acqua». E come che passemo a drita de un monitore, sto monitor fis'cia cola sirena, e tira su una bandiera. E el Comandante Bùnicich col canocial el varda e el dise: «I dimanda cossa che volemo». «Far acqua, ah, volemo, go sempre dito che la Marina Militar co' no xe guera xe per intrigo». E iera là sul ponte Cuntento che lustrava i otoni e el Comandante Bùnicich ghe disi, ci fa ci dice: «Cuntento, alzéghe su la bandiera sula maestra che dovemo far acqua». — La bandiera? — Sicuro, in Marina se fa sempre segnai cole bandiere. E 'sto Cuntento va zò dove che iera i scafeti cole bandiere e el varda sul libro che iera notadi tuti i segnai, che iera scrito, per esempio «Chiediamo di entrare», «Malato a bordo», «Portiamo posta», tanto per dir. E in 'sto libro che ve digo, el vedi scrito vizin de un segnal: «La barca fa acqua». Bon, ga pensa Cuntento, questo sarà che femo acqua. El ciol 'sta bandiera e el la issa suso sula maestra. Siora Nina, coss' che no xe nato! Vedemo la «Viribus» che vira, dò monitori che vien un de qua e un de là de nualtri, tuta la fila che se averze, la «Santo Stefano» che bateva bandiera del Amiraglio Horthy che meti el segnal che disi «Veniamo subito», e un'altra bandiereta su, vizin de quela del Amiraglio Horthy, che dopo i nega spiegà che vol dir «Attendo che ogni marinaio faccia il suo dovere». — I ve portava acqua? — Ma no, siora Nina! Sto sempio de Cuntento gaveva tirado suso la bandiera che vol dir «La barca fa acqua». Come dir che andemo a fondo. E lori, in parada che i iera, ì ga manovrado subito, tuta la Flota — e che ben anche — per il socorso in mare. L'Amiraglio Horthy comandava personalmente sul ponte, col canocial e el capel puntà, i ne ga contado dopo in Governo maritimo. E vien soto un de sti monitori e un ne ziga col portavoce dove che femo acqua. «Al molo — ghe risponde Bùnicich — là dove che xe la màniga! " Siora Nina: savé quanto che ga dovesto pagarghe el LLoyd Austriaco ala Marina de Guera? Tremila fiorini. De disagio. |
|
This page compliments of Marisa Ciceran Created: Thursday, June
19, 2008; Last Updated:
Sunday, June 29, 2008 |
