|
|
|
La
lavanda dei piedi La «maldobrìa» di sior Bortolo — Orade orade, ociade, ociade, sardele, sardoni, sardunìci, capesante, capelonghe, caperòzzoli. Ale àle, done, che el sol magna le ore, àle àle, siora Nina, che el magna anca per vù. — Orpo, sior Bortolo, se no ga magnado ore el sol de quando che vù gavé cominciado a contarle. Tuti sa che vù sé quel che qua sa più de tuti, tuto de tuti. — Savé cossa che ve dirò mi, siora Nina? Che el sol magna le ore, ma mi no magno memoria. La memoria ve xe tuto cio’ no ve xe altro. Parlo per i altri, magari, perchè mi, con tuto che ai mii ani go visto mondo, e che mondo, istesso no me dispiase de veder ’sti ani qua. E — aré che ve digo la sincera verità — ogigiorno el mondo xe tuto cambiado. In vinti ani se ga fato più che in dozento, mi calcolo. Una volta, le vece stava a casa a far le cuzazénere e i veci, se i restava soli, poveri, i li meteva in Ospizio Marino. Come Barba Checo, defonto che lui co’ xe morto el gaveva, mi calcolo un novantoto, novantanove. Però istesso el ga avudo la sua sodisfazion... — Novantoto! Metessi mi la firma per rivarghe. Ma forsi anche che no. Perchè, dopo, co’ se xe tanto veci, se xe solo che per intrigo. La madre de mio padre... — Indiferente. Barba Checo, ve disevo, quela volta andava per novantazinque, novantasie. — Ma no me gavé dito novantoto, novantanove? — Co’ el xe morto, novantoto, novantanove. Ma quela volta che i lo ga mandado a Viena, l’andava per novantazinque, novantasie, mi calcolo. Perchè, savé, no se saveva. Quela volta in Comun, dove i tigniva scriturazioni de nàssita? Solo in Cesa, nel libro dei batizi. Ma lui iera dalmato de Spalatro, ancora de soto Baiamonti, cossa volê? E co’ i ghe domandava: «Barba Checo, quanti ani gavé?» «Un più dela Morte!» — el rispondeva sempre in Ospizio Marino, povero Barba Checo. — Cussì el gaveva dovesto andar a Viena? — Come cussì el gaveva dovesto andar a Viena? Lui a Viena xe andado come ultimo superstite? — De Baiamonti? — Cossa de Baiamonti? Baiamonti iera Podestà de Spalatro in antico. Quel ve xe tuto un’altra roba. Barba Checo iera ultimo superstite del «Novara» che iera andado zò in Messico a cior Massimiliano copà. — A Novara? — El «Novara», siora Nina: la barca de Massimiliano, sua de lui. Che lui iera andà zò col «Novara», come Imperator del Messico e — vedé el destin — con quela stessa barca i lo ga portà su copado. E i funerali che iera a Trieste! I me gaveva contado savè, perchè mi co iero ragazeto 'sta roba zà apena i contava. Ma Barba Checo, lu, iera stado proprio militar de Marina de guera. I xe andadi a cior Massimiliano copà a Vera Cruz. "Vera Cruz — diseva sempre Barba Checo in Ospizio Marino — se ciama Vera Cruz perchè là ve xe una s'cenza dela vera Crose de Nostro Signor che tuti vien in pelegrinagio. "Mi iero a Vera Cruz — el diseva — son andà a cior Massimiliano copà con el " Novara". Del sessantasete. Pensevese che vecio che son. Che el Signor no se ricorda de ciorme. Mi ve go un ano più dela Morte. E povero Massimiliano inveze, cussì giovine. Mi lo go visto copà, cola sua bela barba spartida in mezo. " Massimiliano, non ti fidare, resta al Castello di Miramare, el cantava, lui, siora Nina, el se gaveva come un poco fissado su Massimiliano. — Ah, per quel i lo gaveva messo in Ospizio? — No.Vecio el iera e no el gaveva nissun che lo tendessi. Miga che el bazilassi, però savè! Lui ve gaveva una memoria, ma una memoria che el se ricordava tuto. — tuto cossa? — Tuto. Del viagio in Messico, de 'sta Camera Ardente che i gaveva fato a bordo. E de giorno e de note Ufficialità e bassa forza che montava la guardia. Che guai se se distudava una candela del catafalco. E insoma, contava Barba Checo, che lui una note ghe ga tocado de tignir el zufolo. — Che zufolo? — Il zufolo del parato del catafalco, siora Nina. Perchè i ghe gaveva fato el catafalco a bordo. Capirè: Arciduca d'Austria, Imperator del Messico e fradelo del nostro Imperator. Insomma a Barba Checo, una note, ghe gaveva tocà de tignir el zufolo. Dodese zufoli iera e un lo tigniva Barba Checo. — Durante la vèa? — Vèa? Iera sempre vèa, siora Nina, fin che no el xe rivado de Vera Cruz a Trieste. E Barba Checo, profitando che in 'sta Camera Ardente iera impizade solo candele — no ve digo che alegria — cola britola el gaveva taiado un pochi de zufoli del zufolo per memoria. — Del catafalco? — Del catafalco. Per memoria de Massimiliano, che lui ghe gaveva tignudo un zufolo. E lui gaveva messo ' sti zufoli del zufolo in una scatula de tabaco e el li portava sempre con sè, come un oracolo. — Col tabaco? — Spetè: lui gaveva sempre de per con sè due scatule de tabaco. Una per el tabaco, che lui tabacava, natural. E quel'altra per i zufoli del zufolo de Massimiliano. Che anzi, che quando che qualchedun andava a trovarlo in Ospizio, che el iera vecio, per portarghe cossa so mi, dò mandole, un pochi de fighi suti, una fiasca de passito, lui diseva: " Grazie, che Dio ve rendi merito! Volè tabacar? E el tirava fora invece la scatula dei zufoli del zufolo. " Ah, me son sbalià! — el diseva — Vecio son: go la testa per intrigo. Savè cossa che ve xe questi? Questi ve xe i zufoli del zufolo de Massimiliano, che iero a ciorlo copà a Vera Cruz. Vera Cruz se ciama Vera Cruz, perchè là ve xe una s'cienza dela vera Croce de Nostro Signore. E cussì avanti. Insomma el iera una crose 'sto vecio, con 'sta storia del zufolo. Ma bon veceto. Sempre cola bareta de montura, me lo ricordo sentado, sula bita del molich del Ospizio Marino. — El tabacava? — Sicuro che el tabacava. Ma cossa ghe entra? Lui gaveva due scatule e el fazeva 'sta pantomina per contar la storia de Vera Cruz e de Massimiliano. Insoma, dovè saver, che iera il Milenovecento e oto e iera el Giubileo de Francesco Giusepe. Sesanta ani de regno, pensevese. Giubileo del Trono. E quel ano, per Giovedì Santo a Viena no i ga fato come i altri ani. I ga volesto proprio ciamar un de ogni provincia del Impero Austro— Ungarico. — Ciamar per Giovedì Santo un de dove? — Siora Nina, Giovedì Santo a Viena iera la Lavanda dei Piedi che fazeva l'Imperator. — Ma la Lavanda dei Piedi no la fazeva el Vescovo de Ossero, che me contava mia madre? — Ma dai! La Lavanda dei Piedi per Giovedì Santo se fa dapertuto. A Ossero gaverà fato el Vescovo de Ossero ma a Viena fazeva l'Imperator. Perchè l'Imperator Francesco Giusepe iera Maestà Apostolica. E la Lavanda dei Piedi no i ghe la gaveva fata ai Apostoli? E alora, chi meio de lu, come Maestà Apostolica? Solo che, de solito, i cioleva dodese veci, i più veci de l'Ospizio dei Poveri de Viena. Ma quel ano che iera el Giubileo del Trono i gaveva divisado de ciamar un vecio per ogni provincia del Impero Austriaco. Veramente, qua, come qua, che ierimo Margraviato d'Istria con le isole di Veglia, Cherso e Lussino, el più vecio dei veci de l'Ospizio Marino, vigniva a star Pillepich che po' ghe gavessi tocà anche come Lissa. Ma povero Pillepich, no gaveva più la gamba. E alora, cossa volè, una Lavanda dei Piedi, senza gamba, gavessi fato strano. — Proprio l'Imperator ghe lavava i pie a 'sti veci? — Oh Dio! Lavarghe i pie ai veci. Simbolico, se capissi, che prima i ghe li gaveva lavadi no so quante volte col savon. Ma, in ultimo, proprio l'Imperator de sua man, nel cadin de oro. — Un cadin de oro? — De oro, de oro. L'Imperator gaveva tuto de oro. Cortei, cuciari, pironi. E insoma, visto che Pillepich no gaveva più la gamba, i gaveva decidesto de mandar Barba Checo, che iera subito el più vecio dopo de lu. E po' perchè el iera anche ultimo superstite, come che ve disevo, de quei che iera andadi a cior Massimiliano copà. E cussì, quando che Don Blas ga predicado in Duomo che, per la nostra Diocesi, l'umiltà del Augusto Monarca, insomma che l'Imperator che gaveria lavado i pie a Barba Checo, tuti xe andadi a trovarlo, anche el Podestà, che iera l'Avocato Miagostovich , che in ciesa no andava mai, perchè el iera ateista. E co' el xe montado in vapor, insieme col Comandante Prohaska, vignudo apositamente de Pola per acompagnarlo a Viena, come marina de guera, me ricordo che Barba Nane ghe ga messo in man vinti fiorini e ghe ga dito: "Bon viagio Barba Checo, passevela a Viena. Solo laveve i pie prima, se no i ve manda via del Ospizio Marino. — Eh, Barba Nane iera assai bon de cuor. Lui dava, dava. — Siora Nina, come Dio ga volesto i xe rivadi a Viena. No ve digo, no ve conto che viagio, che viagio. Zà in Governo Maritimo de Trieste i ga comincià a lavarghe i pie a 'sto povero Barba Checo. Che lui a tuti i Ufiziai el ghe diseva: " Tabaché? " e po' el ghe mostrava i zufoli del zufolo de Massimiliano. Po' i ga tornà a lavargheli in stazion de Graz, po' al Ospizio Marino de Viena, dove che i gaveva messo insieme tuti 'sti veci dela Lavanda dei pie. E scarpe e calze nove i ghe ga comprà. Po' un'ora prima, in Palazzo Imperial, che se ciamava Hofburg, de novo ghe ga lavado i pie le Suore de San Vincenzo. E un dotor, penseve, un dotor ghe ga taià le onge. Iera 'sto salon, ga contà el Comandante Prohaska, imenso. E tuti 'sti veci sentadi in poltrona, con tuto atorno Uficialità, Corpo Diplomatico, Nunzi Apostolici, fina che xe vignudo dentro l'Imperator con un che ghe tigniva el cadin de oro. E a un per un, lui ghe lavava i piedi e ghe diseva robe. — Robe de piedi? — Ma cossa, robe de piedi? 'Sti grandi drio de lui gaverà dito: " Questo è un vecchio dela Stiria" e alora l'Imperator ghe gaverà dito qualcossa dela Stiria, come che usava i regnanti. Fina che l'ariva là da Barba Checo. Che anzi prima, el Comandante Prohaska ghe gaveva portà via la scatula dei zufoli, per paura che no'l ghe la mostri al Imperator. E insoma, — contava 'sto Comandante Prohaska — l'Imperator inzenocià meti i pie de Barba Checo nel cadin de oro e ghe disi pian qualcossa. E 'sto Barba Checo, prima un poco, e dopo sempre de più, el taca a riderghe. — Al Imperator? — Sicuro. Ma rider cole lagrime ai oci, contava el Comandante Prohaska. E pensè, l'Imperator lo ga vardà de soto in suso, inzenocià che el iera e ga ridesto anche lu. E sempre più rider l'Imperator. E sicome che rideva l'Imperator, alora ga ridesto tuti. Uficialità, Corpo Diplomatico, Nunzi Apostolici. Anche el Comandante Prohasta. E co' l'Imperator xe andado via col cadin de oro, tuti atorno de 'sto Barba Checo che ghe domandava. — Cossa i ghe domandava? — Come cossa i ghe domandava? I ghe domandava cossa che ghe ga dito l'Imperator che ghe ga fato tanto de rider quando che el ghe lavava i pie. "No so — ga dito Barba Checco — perchè el parlava per todesco: mi go ridesto perchè el me faxeva grizoli sui pie. E po' el ghe ga domandado a tuti: " Tabaché?" E co' el se ga inacorto che no el gaveva più in scarsela la scatula dei zufoli el se ga messo a pianzer. Savè come che xe i veci. |
|
This page compliments of Marisa Ciceran Created: Thursday, June
19, 2008; Last Updated:
Sunday, June 29, 2008 |