Carpinteri & Faraguna
Short Stories and
Humor
|
|
|
Il principe e il povero In cui Barba Checo uomo d'altri tempi già in tempi remoti, dimostra ad un Augusto Ospite di Lussino di aver molto da insegnargli e, successivamente, d'avere, fuori dalla sua isola, anche qualcosa da imparare. — A Lussin, de inverno co' no xe bora, par istà e no xe gnanca primavera. Per questo una Lussin ve xe una Lussin. Difati mi iero ancora ragazeto che de inverno a Lussin vigniva i più grandi ...— I più grandi de vù, come? — Come i più grandi de mi? Sicuro che i più grandi de mi, ma i più grandi de tuti, i primi dotori de Viena, za quela volta i diseva che per i deboli de petto no xe la meo che Lussin ... — Eh iera sì una volta più de un debole de petto, adesso istesso no se senti tanto. La defonta nona de mio marì che gaveva avudo zinque fioi, prima — pensévese —ghe xe morti de mal de petto i dò gemei, po' la fia più granda, apena finide le scole... — Indiferente. Cossa me vignì a contar disgrazie dei tempi de Marco Caco. Mi ve contavo che i primi dotori de Viena diseva che per i deboli de petto, pretamente no xe la meo che Lussin, de inverno. Presempio, perché credè vù che l'Arciduca Carlo Stefano se gaveva fato a Lussingrando in Rovenska quela imensa vila che xe a Lussingrando in Rovenska? — Per vignir a star. — No. Perché el iera debole de petto. Oh dio, debole de petto: pretamente ètico el iera, ghe gaveva dito i meo dotori de Viena, come dir in malora cola casseta, e alora star atento, no sfadigarse, guai fumar spagnoleti e, de inverno, gnente de meo che Lussin. — Ah 'sto Arciduca Carlo Stefano iera malado de petto, come? — Come «come»? Pretamente etico, el ve iera, de quei con febre de dopopranzo. Oh dio, avendo possibilità questi etichi, quela volta i ve durava anni anorum, e a Lussin qualchedun se gaveva anca inguarido. Ma l'Arciduca Carlo Stefano, in principio, ve iera assai mal. Me ricordo come ieri che co' el xe rivado col vapor a Lussinpicolo e i lo ga menado a Lussingrando in carozza, Barba Checo ghe ga messo una coverta sui zenoci, a quadratoni, vedè cossa che no se se ricorda qualche volta... — Eh, zerte robe resta, resta impresse. Barba Checo, disevi, qual Barba Checo? — Barba Checo, po', el vecio Barba Checo, che za quela volta, figurévese, prima dela Prima Guera, iera za in pension. E in pension che el iera, istesso el iera sempre sentà fora del Governo Maritimo, su un bancheto de piera che iera là propio soto dela stema col'Aquila a dò teste. E cussì co' xe rivado a Lussinpicolo l'Arciduca Carlo Stefano, i ghe gaveva dito de compagnarlo anca lui in carozza a Lussingrando e lu ghe gaveva messo una coverta sui zenoci, a quadratoni. — Eh iera vecio sì Barba Checo, me ricordo anca mi — Uh, co' el xe morto el gaveva un'eresìa de anni, no se ga mai savesto quanti perché quela volta gnanca no i tigniva scriturazioni, co' el iera nato, intendo. Indiferente. Vecio in pension el ve iera za, co' xe rivado 'sto Carlo Stefano malado e compagnia che el ghe gaveva fato in carozza ciacolandoghe, ciacolon che el iera, e tuto mo- strandoghe e setandoghe la coverta sui zenoci, subito 'sto Arciduca Carlo Stefano lo gaveva ciolesto in simpatìa. «Dove xe l'omo?» — el dimandava sempre in vila in Rovenska, e alora subito i mandava a ciamar in Governo Maritimo Barba Checo che lu, ve disevo, iera fazile trovarlo perché el iera sempre sentado su quel bancheto de piera, propio soto dela stema col'Aquila a dò teste del Governo Maritimo. — E Barba Checo ghe andava a far compagnia? — Come no? Lui tuto ghe contava, e tuto ghe mostrava: «Quela de 'sta parte ve xe Arbe ... oltra podé anca veder Veglia ... e Cherso ve xe quela. No: el bruto tempo no ve vien de là, el bruto tempo ve vien de 'sta altra parte: de San Piero ai Nembi... No quel no ve xe un cocal: quel ve xe un màsoro, magnabalini come che ghe ciamemo nualtri, sior». E el rideva ... — Chi, Barba Checo? — No, l'Arciduca Carlo Stefano rideva, de 'sto veceto che lo ciamava «sior», perché tuti i altri qua, a Trieste, a Viena, massima parte, i lo ciamava Altezza Imperiale,Vostra Grazia, Doppia Altezza, cossa so mi ... E Barba Checo inveze «Sior», «Sior l'Arciduca», qualche volta. — Eh iera assai cocolo veceto Barba Checo ... — Veceto si, ma ancora in gamba. E volé creder che 'sto Arciduca Carlo Stefano, subito meo che el ga comin- ziado a star, aria bona che xe a Lussin de inverno, quasi più gnente che no el fumava spagnoleti, che inveze a Viena, i diseva, che el fumava orori, atenti che ghe stava tuti, sol e riposo, el stava za meio. E qualche volta co' iera bele giornade, pensévese, Barba Checo lo menava in caicìo, in 'sti bei loghi che xe a Lussin, una Crivìzza, un Zabodàrski, e no parlemo Cigàle. — Ah el se menava in caìcio con Barba Checo, cussì, lori due soli? — Sicuro. Per quel l'Arciduca Carlo Stefano ve iera pretamente democratico, el lassava dito, natural, dove che i andava, ma l'andava in caìcio solo con Barba Checo che ghe vogava, ancora in gamba che el iera. Perché, savé cossa che ghe iera vignuda tutintùn a 'sto Carlo Stefano? — Febre de dopopranzo! — Vermi per esca! — No. Spagnoleti. Perché i dotori de Viena e anca el dotor Colombis qua, che andava ogni giorno in Vila, ghe gaveva inibido i spagnoleti, e Barba Checo inveze, in caìcio, de mezamatina, dopo marenda che i portava de per con sé — sànguich de rosete con persuto coto che no xe pesante e una fiascheta per béver drio dò dedi de vin rosso che fa sangue — Barba Checo, dopo, tirava fora, tuto soridente, 'sta scatuleta, come un oracolo e ghe dava de fumar al Arciduca Carlo Stefano una Kedivé che, de tuti i spagnoleti che i vendeva in apalto a Lussin, iera i più lisieri. «Un al giorno no fa mal, per chi che iera abituado, Sior — el ghe diseva — e dopo el se impizzava anca lu un spagnoleto, e tuti dò i fumava pulito in caìcio, vardando el mar, Arbe, e Veglia che se vedeva in fondo, bela giornada che iera. — Sì, sì: un spagnoleto ogni tanto no fa mal. Mal xe quei che impizza un spagnoleto novo cola cica del vecio ... — Naturai, per un che xe malà de petto. Ben: i pescava pulito, savé, perché Barba Checo conosseva i loghi. «Ogi gavemo per esca vermo de Rimini, Sior, e ciaparemo orade» ghe diseva Barba Checo. «Un'orada! Un'orada!» zigava l'Arciduca Carlo Stefano tirando suso. «Ma no ve xe un'orada, questo, Sior — ghe diseva Barba Checo discuzzandoghe el pesse delamo— questo ve xe un sargo. Anca bon: lessado con oio, sal e un fià de radiceto e guai limon che ruvina el gusto del pesse. Un sargo ve xe, Sior. Bel sargo.» E cussì !ui tuto ghe imparava dei pessi, capì siora Nina. «No, Sior, questo no ve xe un branzin. Dove pò! esserve questo un branzin? Questo ve xe un ziévolo. Bel ziévolo, de scoio.» «Cossa, pàssera? Questa ve xe una sfoia! Bela sfoia. Orpo che bela sfoia che gavemo ciapado, Sior. Questa ve xe bona frita. Dilicata.» E una roba e l'altra. — E i magnava dopo, anca? — Come no? L'Arciduca Carlo Stefano fazeva pareciar tuto cossa che i ciapava e per Barba Checo el ghe fazeva prontar in cusina, perché lui capirè, del Sangue che el iera, el doveva magnar coi sui in camera de pranzo. — Eh, un Arciduca come volé che magni in cusina? — Natural. E co' iera inveze tempo missià, che ve contavo, istesso !ui lo mandava a ciamar de matina bonora e inveze de andar in caìcio i andava in carozza de Lussingrando fin Lussinpicolo a veder i pescadori che scarigava le cassete de pesse. «No, questi no ve xe scombri — ghe diseva Barba Checo — queste ve xe lanzarde; no, queste no ve xe ragòste, questi ve xe astisi, Sior, noi no gavemo ragòste! Per quele ghe vol andar in Dalmazia ...» — E i xe andadi in Dalmazia? — Ma no: come volevi che
el podessi moverse fina in Dalmazia? I tornava a Rovenska cola carozza. E
un — Come dir che lui iera Arciduca? — No, come dir che xe l'apalto e che el vadi a comprar Kedivé che no manchi. «Eh, Sior — ghe diseva Barba Checo — ogi, me par che gavemo fumado za bastanza.» Ma istesso el smontava e el andava a comprar. I iera propio deventadi intrinsechi e po', un anno za che el stava a Lussin, 'sto Arciduca Carlo Stefano stava propio assai meo. El gaveva più color anca. Tanto che quela volta no xe sta né Dio né santi, e con tuto che el dotor Colombis ghe gaveva dito «io non consiglio», ben, a tuti i pati lui ga volesto andar a Postumia. — A veder le grote de Postumia? — Cossa le grote de Postumia, che el ciapava fredo! A Postumia, là rente de Postumia, che quela volta po' se ciamava Adelsberg, pensévese, ve iera el Castel de un de 'sti grandi del'Austria, un Windischgraetz, un Jélacich, un Radetzki, no me ricordo, che gaveva invitado a càzia Francesco Ferdinando, che iera Erede dela Duplice e gaveva 'sta moglie morganatica, savé come che iera, che no la podeva mai star con lui e tuti ghe fazeva sprezzi perché la iera morganatica. — Eh i parlava, i parlava de 'ste robe una volta. — Bon, 'sto Arciduca Carlo Stefano, propio per 'sti sprezzi che ghe fazeva tuti i altri, lui ga volesto andar, perché el iera assai intrinseco de Francesco Ferdinando, che iera stado anca malado de petto un periodo. Ben, volé creder, che a tuti i pati el ga volesto portar con sé Barba Checo. — Ah, per farghe conosser Francesco Ferdinando ... — No, cossa volé che ghe podessi interessar a un Francesco Ferdinando de conosser Barba Checo! No, per compagnia in viagio. Lui iera inabituado oramai a sto cocolo veceto che ghe ciacolava e anca el dotor Colombis e i sui, iera più pacificadi, perché i saveva che Barba Checo, più de un spagnoleto al giorno no ghe dava ... — Omo de fiducia, come. — Sicuro. Bon: per farvela curta, in vapor fin Fiume, e po' in carozza de Stato a Postumia, cola stema col'Aquila a dò teste sul sportelo. Che po', co' i xe rivadi, a Barba Checo per dormir, in 'sto castel i ghe ga dà una bellissima camereta, in sufita natural, coi teto un poco in piover,ma che se vedeva tuti i boschi. Lui ve iera propio contento. — Barba Checo de 'sta camereta? ... — Anca, che dopo el ga contà el contabile. Ma assai contento ve iera 'sto Carlo Stefano, perché de tanti anni, malà che el iera, no el gaveva più podesto andar a càzia. E de matina bonora, col s'ciopo in spala, el ga subito dimandà: «Dove xe l'omo?» No tanto matina bonora: iera meza matina, perché i altri iera za andadi via ale zinque, ma lui col umido no el se fidava. «Dove xe l'omo?» Subito i ga mandado aciamar Barba Checo, suso in camereta e lui con Barba Checo, pian senza sfadigarse, con un can davanti, i xe andadi per 'sto bosco per trovarse con Francesco Ferdinando e coi altri che za fazeva marenda. E pien de bestie che iera 'sto bosco, come che i caminava cussì calmi, el can ga alzà un fasàn. E 'sto Carlo Stefano, ga tirà zò el s'ciopo de spala, e, de prima cana, lo ga ciapà. «Bravo, Sior! — ga dito tuto stupìdo Barba Checo, ciolendoghelo via dela boca del can — che bel becanòto!» «Ma no, no becanòto — ghe ga spiegà l'Arciduca CarloStefano — questo, Barba Checo, vi è un fasàno. Bono rosto» E col déo el se ga fato cussì sula ganassa. «No,Barba Checo — el ghe spiegava po', andando avanti e mostrandoghe altri usei — quele là suso non sono quaie,quei sono pagneròi.» E po' el ghe diseva tuto dele pernisi,dei zeneveròni e una roba e l'altra. — Ah, el caziava? — Caziava! El caminava caziando per 'sto bosco. E se ghe vigniva un tiro, natural, el tirava. Fin che, tutintùn, come che i caminava e che Barba Checo ghe ciacolava che anche a Lussin xe usei, 'sto Carlo Stefano, se ferma decolpo e ciapandolo per un brazzo el ghe fa: «Zito!» El ghe mostra un usel alto alto che svolava, el smira col s'ciopo e pim-pum, dò colpi. E volé creder? Come un perognoco xe vignù zò 'sto usel: grando, enorme, imenso che fin el can gaveva paura de andarghe vizin. — Marna mia! — Xe quel che ga dito Barba Checo: «Mama mia! Che toco de bestia che gavemo ciapado, Sior. E diséme Sior, che usel ne xe questo?» «Ma come, Barba Checo — ghe fa 'sto Carlo Stefano batendoghe la man sula schena tuto soridente — xe un'aquila, un'aquila xe!» «Ah no po' — ghe ga dito Barba Checo — no po' Sior, vù me cojoné, come pol esser un'aquila, con una testa sola?» Volé creder, siora Nina, che de sera a zena in 'sto Castel, in camera de pranzo, cole possade de oro, co' l'Arciduca Carlo Stefano ga contà 'sta storia, Francesco Ferdinando ga volesto andar zò in cusina per conosser Barba Checo. |
|
This page compliments of Marisa Ciceran Created: Thursday, June
19, 2008; Last Updated:
Sunday, June 29, 2008 |