|
|
|
Il tràiber Nella quale si narra della modesta posizione occupata da Bepi Màrovich nel contesto sociale di un Paese ordinato e di quel che gli accadde in Padova nel pittoresco disordine dei radiosi giorni del maggio 1915. — Natural che i fioi unici no vien su ben, perchè, cossa volè, in un fio unico ghe xe sempre qualcossa fora squara. Però no xe dito: vardè qua, per esempio, vù gavevi el specio nel fio del avocato Miagòstovich che — fio unico, viziado e viziabile — epur, un dei primi el xe diventado. — Primo avocato? — No avocato, avocato ve iera l'avocato Miagòstovich, el padre; el fio inveze ga vossudo studiar per dotor. Che anzi, al padre ghe gaveva assai dispiasso, perchè el diseva, qua per ti xe tuto pronto, el scritorio te va vanti solo. E lui inveze dotor, dotor, a tuti i pati el ga vossudo studiar per dotor. Pensè vù come che xe nele famée: el fio del dotor Colombis, inveze avocado. Un padre no pol mai far un calcolo sul fio. Ve disevo: in scritorio del avocato Miagòstovich andava tuto avanti solo, lori più che altro gaveva de far scriturazioni, carte de mandar avanti a Pisin, a Pola, a Fiume, o al massimo a Trieste. Per bravo, l'avocato iera bravissimo e chi che se meteva in man sue iera al sicuro. E po' el gaveva quela fortuna de gaver in casa Bepi Màrovich. — Bepi Màrovich, gavevo sentido. — Per forza che gavè sentido, Bepi Màrovich fazeva tuto per i Miagòstovich. E bravo giovinoto el iera, perchè, pensè, Bepi Màrovich iera qua su del monte de Dragosetti, che i Miàgostovich a Dragosetti gaveva ulivi e vide e piègore, e senza padre che el iera restado ragazeto ancora, l'avocato lo gaveva ciolto qua che el daghi una man in botega dela moglie. L'avocato gaveva sposado una fia del vecio Mòise, che lori gaveva de tuto, campagne, case, mulin e la botega che el padre ghe gaveva intestado a ela co' la se gaveva sposado. In botega, propio drio del banco, lori gaveva quela Pierina, ve ricordè, che xe morta, e Bepi Màrovich, ragazeto ancora, ghe dava una man. Lui ghe fazeva i scartozi, el ghe travasava i butilioni del oio, el ghe portava la roba del magazen, e anche in scritorio, se ocoreva, ghe tendeva el caìcio, ghe lo piturava e, poco più grando che el iera del fio del avocato, el lo mandava a compagnar e a cior a scola e el ghe portava i libri, come che se usava quela volta. — Gavevo, gavevo sentì de Bepi Màrovich. — Come no, sicuro: lui ghe fazeva tuto per i Miagòstovich. Co' l'avocato gaveva de andar in dibatimento a Pisin — che a Pisin una volta iera tuto — lu lo compagnava col birocin, el ghe andava a comprar spagnoleti, tuto insoma el fazeva. — Omo de fiducia. — Tràiber, siora Nina. Lui iera propiamente el tràiber del avocato. Onesto fin l'anima, mai profitado, mai preteso gnente, el iera sempre con lori, el xe cressudo quasi insieme col fio del avocato: però tràiber, e sempre stado al suo posto. Che 'sto fio savè, de picolo iera un viziado, come che per forza xe tuti i fioi unici. Piron lustro, sedia nova, carne bona, pan de soto, po'. — Come piron lustro, sedia nova, carne bona, pan de soto? — Ma dai, siora Nina, che saveva tuti che 'sto fio del avocato Miagòstovich, capricioso che el iera, co' el se meteva in tavola el pretendeva de gaver un piron lustro, insoma più lustro dei altri che i gaveva; sedia nova, 'sta carega che i gaveva fato far; carne bona, guai una pele se el trovava e pan de soto: la crosta del fondo de la struza el voleva. Viziado po'. Ma a scola inveze, bravissimo. Prima a Pola, che i lo gaveva messo a costo e po' a Padova in Università. Ve go dito che a tuti i pati el ga volesto studiar per dotor. — A Padova? — Sì, a Padova. Perchè savè come che iera qua, tuti quei dela Democratica, l'avocato Miagòstovich, un dotor Colombis, un farmacista Petris e i Millevoj, lori tigniva assai per l'iredentismo e no i voleva mandar i fioi a studiare a Graz. Lori tuti a Padova i li mandava, perchè anca lori gaveva studiado a Padova. — Eh a Padova xe el Santo. — Cossa ghe entra el Santo! I andava in Università de Padova. E iera tuti savè a Padova: el fio de l'avocato che studiava per dotor, el fio del dotor Colombis che studiava per avocato, el fio del farmacista Petris che fazeva farmacia, natural, perchè lori gaveva la farmacia, e tuti dò i cugini Millevoj. Del Tredici, me ricordo, lori iera partidi, perchè i iera tuti coetanei. Ben, e Bepin Màrovich fina Padova andava del fio del avocato Miagòstovich. — Per compagnarlo a scola? — Cossa compagnarlo a scola, che el studiava zà per dotor! No, l'avocato mandava Bepin a Padova, penseve, un per de volte al mese a portarghe al fio formagio de Cherso, che lui ghe piaseva assai, vin de casa, passìto e oio per conzar la salata, perchè se lui no gaveva l'oio de Dragosetti no ghe pareva oio. Savè, el iera sempre restado un poco piron lustro, sedia nova, carne bona e pan de soto. — Viziado come? — Vizià? I lo viziava. E co' un vizia, chi no se fa viziar, siora Nina? Anche a mi me gavessi piasso gaver cussì un padre e cussì un tràiber. Inveze noia strussiar e far e pericolar per mar. Indiferente. Ben, questo ve iera in quei ani. E del Quindici, che iera magio e che el fio del avocato doveva dar esami, va fora a Padova Bepin cola cofeta dela provianda. Ma a Padova no el lo ga trovà a casa e alora el xe andà per strada e el ga visto che iera assai movimento. 'Sti studenti con bandiere che cantava " Abbasso gli Asburgo e i Lorena" e un, su un pergolo, che diseva che el nostro Imperator impica tuti quanti. Insoma, bruto. — Dimostrazion? _ Dimostrazion sì: perchè lui iera capitado a Padova che propio a giorni l'Italia doveva intimarghe guera al'Austria. E cussì e culì. Tanto che co' xe tornà a casa, dove che el stava a Padova, el fio del avocato ghe ga dito: " Bepi, cossa ti fa qua? No ti sa che ogi, diman xe guera?" Insoma per farvela curta, guera xe stada e Bepi iera a Padova. Cossa che el ga de far, cossa che no el ga de far. "Mah — ghe disi el fio del avocato — Bepi mio, fa quel che ti vol: ti qua ti son sudito austriaco e i te interna. Se propio ti vol, ti pol tornar a casa passando per Svizzera. Ma te merita? Un giorno o l'altro i te manda in Galizia anca ti, che oramai ti xe de leva. Mi in ti farìo come che femo nualtri: noi tuti, anca i Millevoj, se presentemo in caserma come irredenti. E quel anca per ti sarìa noma che ben, perchè come irredento no i te interna e ti fa el militar con nualtri, che tanto, ogi diman, l'Austria va in malora." — Andava in malora l'Austria? — Cussì i parlava. E insoma, tanto el ga dito, tanto el ga fato, che Bepi Màrovich se ga presentà con tuti lori in caserma del militar a Padova, come irredento. E in 'sta caserma, una confusion che no ve digo: primi giorni de guera iera. E un graduato, un sergente italian, cioleva nota in un notes de 'sti qua. No so, per dirve, al fio del dotor Colombis el ghe ga dimandà: " Tu, come civil, cosa facevi?" "Studente di legge". " Bon: Fanteria". I Millevoj ga dito: " Noi studiemo per ingegneri". "Bon: Artiglieria". Petris, farmacista: Bon, Sanità. El fio del avocato che studiava per dotor, natural, Ospedal de Campo. — I li destinava? — Sicuro. E dopo 'sto sergente italian ghe ga domandà anca a Bepi Màrovich cossa che el fazeva de civil. "Mah — ci fa ci dice Bepi — io ero col padre di questo signor Miagòstovich". "Come cossa?" " Come tràiber". "Tràiber? — dise 'sto sergente italian — Tràiber. Va ben" E el nota sul notes Tràiber e che vedremo dopo, che anzi vegni con lui del Capitano. E i va de 'sto Capitano, su in scritorio dela caserma e 'sto sergente italian el fa el dice al Capitano che tuti gli iredenti sono ormai presi in forza, che resta solo questo Tràiber, e la decida lei dove lo metiamo. "Tràiber? — disi el Capitano — vedo, vedo, certo certo: abbiamo bisogno di Tràiber". El se alza del pulto e con 'sto sergente italian i porta Bepi del Colonelo. " Signor Colonelo, qui ci sarebbe un Tràiber delle Province Irredente" "Ah — disi el Colonelo — i famosi Tràiber! Bravo!Bravo!" E in quela vien drento un General col barbuz, tuti in pìe che lo saluda e el Colonelo el fa el dice: " Signor Generale, abbiamo qui tra i volontari uno dei famosi Tràiber delle Terre Irredente". "Giustamente famosi — fa 'sto General — Bravissimo! Come vi chiamate?" "Bepi Màrovich" "Bene, Bepi Màrovich, allora mi organizzerete un reparto di Tràiber!" — E el ghe ga fato un reparto de Tràiber? — Sicuro. El fazeva istruzion vizin Venezia, insieme con un certo Stolfa, un triestin, che i ghe gaveva dado de organizzar un reparto de Bùbez. |
|
This page compliments of Marisa Ciceran Created: Thursday, June
19, 2008; Last Updated:
Sunday, June 29, 2008 |