 Calcolar veci?

 Calcolar e esser, siora Nina. Perchè a sessantazinque , una volta un omo ve iera pretamente vecio. Fora del mondo, come: massime i campagnoi. Figurevese che i ultimi ani dela Prima Guera, el vecio Ivissa sempre gaveva quela de dir «El nostro Imperator Francesco Giusepe…».

 Per dir cossa?

 Indifferente cossa: quel che el gaveva de dir. E i fioi ghe diseva: «Ma no, papà, no ve xe, no ve xe più Imperator Francesco Giusepe, adesso ve xe Imperator l’Imperator Carlo». «Va ben, va ben: Carlo», rugnava el vecio Ivissa, «Carlo o no Carlo, a ogni ora la sua ora».

 El rugnava?

 Tutti i veci rugna, siora Nina. Disevo per dirve come che iera quela volta Rependa, cusssì, coi campagnoi. Ma lui, vecio za’ che el ve iera, ancora l’andava a sfalzar fien. E sfalzando fien, una volta, el se ga da’ cola falza sul colo del pìe.

 Eh bruto! La falza taia.

 Sicuro che la taia. Se no la taia no la serve. Ma qua lo ga curado pulito el dotor Colombis, che anzi ghe ga dito: «Perché, Ivissa moi, adesso che podè caminar de novo, no andé a Trieste, che i ve darà l’infortunio?». E cusssì, una roba e l’altra, anca i fioi lo ga fato persuaso de andar a Trieste a passar visita e a tirar  ‘sti soldi del infortunio.

 Ah, pulito!

 Cossa pulito, con quele picolezze che i ghe dava quela volta! Anca soto l’Austria quel no iera ben regolado. Ma no iera per questo che ve disevo. Iera per dirve che quundo el vecio Ivissa ve xe tornà de Trieste, a Rependa lu contava maravèe.

 Del infortunio?

 Sì anca del infortunio, che el gaveva tirado quei picoli. Ma lu più che altro ve contava che a Trieste, quando che fa scuro de sera, xe tuto impizzà. Che a Trieste i ga l’eletrico, che un che no ga visto l’eletrico no pol gnanca imaginarse cossa che no xe l’eletrico. E che proprio là, del Infortunio, in un cameron che spetava tuti, che iera sie ore de sera e che cominziava a far scuro, xe vignù drento un, un cursor come, che xe andà rente de una roba de porzelana che iera sul muro, el ga dà de volta con do’ dèi e in mezo del plafon se ga impizzado un lume imenso che picava de un cordon fato a drezza. «Pensèvese, cusssì un semplice cursor: cossa che no ve xe l’eletrico!».

 A Trieste questo?

A Trieste sì. Cossa volevi che a Rependa i gavessi l’eletrico, Prima Guera ancora che iera? Dopo i ga messo, in Albona.

 No a Rependa?

 No a Rependa. In Albona apena. Che mi me ricordo ben che i gaveva messo i pài de Pola fina Albona. E dopo apena, de Albona fin a Ràbaz. Ma a Rependa, che no passava la linia, gnente.

 Eeeh: se no passa la linia, no pol l’eletrico…

 Sicuro che no pol. Come volevi che ve vegni a Rependa l’eletrico se no iera la linia? Per opera del Spirito Santo? E inveze, volendo, se gavessi podesto.

 Eh se i vol, i pol, i pol!

 Xe quel che diseva el vecio Ivissa, quando che, co fazeva scuro in casa, la moglie tirava zo’ el lume dela napa, lo impizzava e la diseva «bonasera». «Se i vol i pol».

 el predicava. E iera anca giusto, siora Nina, perché iera zà del Trentaun, questo.

 Trentaun del mese?

 Ma no trentaun del mese! Mile novezento trentaun, che Albona e Rabaz gaveva zà la luce e Rependa gnente.

 Eh iera, iera ssì la luce in Albona…

 Sicuero, e el vecio Ivissa ga mandà su in Albona el fio – ve ricordè quel Zaneto? – a farghe un solecito, come, che i se disbrighi de meter l’eletrico anca a Rependa. E là in Albona questi del Eletrico ghe ga dito che la linia xe de Albona a Rabaz, che lori no ga ordine per Rependa, ma se quei de Rependa vol, volendo se pol, a spese sue natural, metendo un pal.

 A spese de ‘sto fio del vecio Ivissa?

 A spese de quei de Rependa, siora Nina. Anca del vecio Ivissa. Solo che el diavolo ve iera la particella dei Nadaja!

 La Particella Nadaja? Una giovine fia dei Nadaja?

 Ma cossa una fia dei Nadaja, Particella? Chi se ga mai ciamado Particella? Iera che, per meter ‘sto pal, per portar la luce a Rependa, i lo gavessi dovesto impiantar in un ulivèr dei Nadaja, e el vecio Nadaja, testardo che el iera, no voleva ceder la particella.

 «Cossa? Che lui pagherà e anca cederà la particella? Che lui gaverà la schiavitù de gaver un pal in mezo del suo ulivèr? E po’ che i pai del eletrico ruvina le ulive». Insomma: una roba e l’altra. E gnente.

 Ma quai Nadaja ve iera questi?

 Indiferente. Quei de Repend ave iera. Ma con ‘sta storia de ‘sto vecio Nadaja che diniegava, iera zà guera de Abissinia e Rependa no gaveva ancora la luce. E ‘sto vecio Ivissa, ogni sera co i impizzava el lume a petrolio, el contava che a Trieste un semplice cursor, dando de volta sul muro, impizzava una lampada imensaa sul plafòn. Insoma, una roba e l’altra el predicava.

 Mi una volta cola man bagnada, che lavavo i piati, go ciapà la scossa….

 Indiferente. Finida ve iera la guera de Abissinia, quando in Albona xe passà telegramma che el vien a veder la miniera del Arsa.

 Chi questo?

 Come chi questo? Mussolini po’. No ve ricordè che el iera vignudo qua aposta a veder la miniera del Arsa?

 Mi quela volta iero in ospidal.

 Bon, lui xe vignudo istesso, siora Nina e no ve digo cossa che no iera. Che i gaveva mandado cartoline per tute le case che tuti deve andar in Arsia propio, che vien Mussolini a veder le miniere del Arsa e che bisogna andar. Cola camisa nera. E che passerà aposta la coriera a cior, anca a Rependa.

 Ah comodo!

 Eh: pitosto che andar a pìe, iera comodo menarse in coriera. Che anzi – me contava Zaneto – co lui ghe ga portado al padre una de ‘ste camise nere che sior Cesare Schitazzi spartiva come segretario del Fassio, el vecio Ivissa ga dito: «Bela, perché questa in miniera gnente no ve se sporca col carbon. Ben pensada!», el diseva imbotonandosela e ficandosela drento dele mudande longhe.

 E i xe vignudi a ciorlo cola coriera?

 Sicuro. Con tuti i altri de Rependa. Fora che el vecio Nadaja che nissun podeva moverlo del suo ulivèr, gnanca de dimenica. Ma no volè che sia, siora  Nina – savè come che iera la strada del Rependa – che, apena partidi, i ga sbusà la goma? E fin che Nini Safèr ga cambiado la rioda, i se ga intardigado e i xe rivadi in Arsia che zà el parlava.

 Nini Safèr?

  Machè Nini Safér! Mussolini parlava in Arsia.

 Con chi?

Ma come con chi? El ghe parlava a tuti. De una roba in alto aposita. E co el vecio Ivissa e i altri xe rivadi in piazza, el stava giusto disendo che Faro di Civiltà, che Mete Luminose. E po’ ogni tanto, impirando i oci e fazendo sesti cola man, me ricordo, el zigava: «E sia ben chiaro! E sia ben chiaro!...»

 Cossa che sia ben chiaro?

Indiferente. Quel che lu voleva che sia ben chiaro. Ma el vecio Ivissa – tra ‘sto faro, tra ‘ste mete luminose, tra ‘sto «sia ben chiaro» che el diseva ogni momento – el gaveva congeturà che el parlava del eletrico. Anca perché co’ dopo i ga zigà «Duce  Duce», come che se usava quela volta, lui, in età  che el iera, capiva che i disi luce. E co’ i ga zigà «A noi!» lui ghe ga dito a Schitazzi che ghe stava a rente: «Sicuro che a noi, anca a nualtri, de Rependa!».

 Povero vecio!

 Cossa povero vecio? Che el vecio Ivissa, con tutti i suoi otantasie, otantasete e passa ani, el iera ben portante. Che anzi, co – finido tuto – Mussolini, che iera vestido de minator del Arsa, me ricordo, cola lampadina invidada davanti sul clabùc, sul capel insoma, el se ga fermà passando rente de Schitazzi e el ghe ga batù sula spala disendoghe non so cossa, ‘sto Schitazzi, tuto rosso, ghe ga dito: «Questi sono quelli de Rependa!». «Benissimo – ga dito lu – bravissimi! E chi è il più vecchio?»

E alora Schitazzi, zucandolo per un brazzo, ghe ga messo davanti el vecio Ivissa.

 Mamma mia! E dopo?

 E dopo ‘sto Mussolini ga volesto saver quanti anni che el ga. Che el va per otantaoto. «Bene, bene: antico ceppo!». «E come vanno qui le cose?» el ghe ga dimandà vardandolo coi oci impiradi. «Ben, grazie parimenti – ghe ga rispondesto el vecio Ivissa – ben grazie, signor l’ingegner. Solo, co tornè a Trieste, ve prego tanto scrivèghe a Vienna al Imperator Carlo che a Rependa no gavemo ancora la luce».

 Jésus Maria. E lu?

 E lui gnente. Lui ga capî Duce, mi calcolo. El xe andà via saludando ala romana, con Schitazzi che ghe coreva drio in stivaloni.

Tratto da:

• Carpinteri & Faraguna, Il mondo delle maldobrie