|
|
|
La beffa di Zebokin Nella quale si raccontano gesta ingiustamente sconosciute dell'Aviazione austro-ungarica nella Grande Guerra, quando per tutti i pazzi delle macchine volanti facevano testo le imprese di Gabriele d'Annunzio. — Vapori? Oh dio, vapori magari ancora xe, ma la gente no ga più pazienza, i ga perso el gusto del bel de un viagio. Che un viagio, aré, siora Nina, xe sempre un bel viagio. Adesso inveze, i ve monta in 'sti aroplani, che xe grandi come treni: i parte baùi e i torna cassoni. Chi gavessi mai pensà. — Che i aroplani porti baùi e cassoni? — Anche. Dove se gavessi podesto concepir una volta che un aroplan, che po' quela volta se ghe diseva velìvoli, pensévese velìvoli, dove se gavessi mai podesto concepir che un aroplan gavessi podesto portar baùi, cassoni, passegeri, zentinera de passegeri! Perché, una volta, siora Nina, l'aroplan, el velìvolo pretamente, portava solo che un omo, massimo due: un davanti e un de drìo. Mi go visto savé! — Gavé visto un davanti e un dedrìo — Sì, anca un davanti e un dedrìo, sicuro. Mi, siora Nina, ve go visto i primi aroplani che esistiva in 'sto mondo: ve parlo dela Prima Guera — De prima dela Prima Guera? — No de prima! De durante. Co' iero a Pola. In Marina de Guera, natural: tuti de tela. — De tela de Marina? In montura de tela? — Sì! In braghe de tela! I aroplani ve iera fati de tela, siora Nina. Che po' no iera gnanca aroplani: iera idrovolanti, quei che se calava sul mar. De legno de traforo e de tela cusida, per via che i sia più legeri, che no i fazzi peso. Altro che adesso che i porta baùi, cassoni, passegeri: zentinera de pasegeri.. De tela ve iera in alora 'sti aroplani. Tela resistente, natural, aposita per aroplani, tela de vela: velivoli, ve go dito, idrovolanti, ma roba che ogi un no ghe montassi suso gnanca per un milion, che un milion, po' cossa xe ogi un milion. E inveze nualtri a Pola, gavevimo proprio l'Aviazion de Marina, el Krixmarine Luft— Sturm, el Stormo dei velivoli dela Marina de Guera Austro— Ungarica, che iera — ancora me ricordo — un zerto Motka, capitano, po' un che se ciamava Bela Boka, un Obertenente ungarese, barca stramba un poco, po' iera Ruzzier, un triestin, piranese de come che 'l nasseva, sempre scavelà, me lo ricordo, e po' un certo Zébokin, che iera sora de tuti, natural. Herr Major Zébokin, un de Viena, sempre cola caramela. — In boca? — Ma no! Sul ocio! Una caramela nera perché el gaveva perso un ocio svolando senza ociai, che ghe iera andado drento una scovazza, capiré con quela briva che i svolava. e col frustin in man, che anzi quel no go mai capì perché: Perché cossa el gaveva de frustar? Indiferente: el lo tigniva per darse un'anda mi calcolo. — Senza un ocio! Come el vecio Malistàri! — Ma indiferente, senza un ocio. Iera guera no! E questi che ve svolava ve iera assai consideradi, e lori po' se tigniva che no ve digo. Che a nualtri de marina semplice no i ne gnanca calcolava. E inveze con quel Superina — che po' chi iera Superina? Un fiuman, sotufizial, come nualtri — i iera tuto un ciò mi e un ciò ti. Va ben che lui come motorista el iera bravissimo. — Superina? I Superina xe de Fiume massima parte. — Sicuro che i xe de Fiume! De dove volè che el ve fussi se el iera fiuman? Ma lui iera a Pola con nualtri, come motorista, e 'sti qua del Luft— Sturm, de 'sti idrovolanti, lo gaveva ciolto con lori perchè el iera un bravissimo motorista e sempre con lori i lo portava nei loghi, tuti in ganga. E pensèvese che el iera fio de un postier. — De un Postier de marina? — Ma dove se ga mai visto postieri de Marina? Lui ve iera fio de un postier de Fiume. Che anzi lui contava sempre che de ragazeto, el padre lo portava con sé per tuta Fiume a butar le letere, i bilieti, le cartoline, le cartoline postali, la corispondenza insoma, nele cassete dele letere dei portoni dele case. — Come che i fa anca adesso! — Come che i dovessi far, siora Nina. Ma indiferente! Mi ve disevo per dirve come che un fio de un semplice postier, motorista bravissimo, specializado in velivoli che el iera diventado, el iera sempre con 'sti grandi che svolava: un Motka, un Bela Boka, un Ruzzier e un Zebokin. Perché, come che i impizzava 'sti motori dei aroplani, lui subito saveva dirghe se qualcossa no andava, a orecia. Bravissimo ve go dito. Pensevese: fio de un postier. — Ah! E svolava anca lu, 'sto Superina? — De drio, siora Nina, nel posto de drio, come motorista. Bon, indiferente. Tuto xe stà quela volta del Volo su Viena. — Ah tuti ' sti qua che svolava xe andadi a svolar su Viena? — Ma per cossa volé che questi del'Aviazion dela Marina Austriaca ve andassi a svolar su Viena? Per perder tempo? No, siora Nina: Danunzio! — Ah! Danunzio! Co' el xe vignudo a Fiume coi danunziani, che i parlava... — Quel dopo, siora Nina. Ma quela volta ve xe stà che Danunzio col'Aviazion dela Marina de Guera Italiana, che anca lori per quel ve iera bravissimi, el ve xe andado a svolar su Viena, guera che iera, fin sora Viena... — Mama mia, a butar bombe, povera gente! — Ma no bombe! Biglieti! Quel ve xe stà. Lori come per un sprezzo, come per una Beffa di Bucari i ve xe andadi fin sora Viena, solo per butar bilieti, bilietini: una bravura, come. — E cossa iera scrito su 'sti bilietini? — Questo ve iera scrito: che lori xe vignudi fin Viena e che, volendo, i gavessi podesto col ferro e col fuoco e che inveze l'Ala Tricolore sul cielo di Viena, come monito insoma....questo ve xe stà. Che tuta Viena ve iera stupìda e piena de 'sti bilietini bianchi rossi e verdi e l'Amiraglio Horthy a Pola se ga infotà come una belva. " Come?! Che a Viena è tuto carigo di bilietini nemici e che noi, che anche abiamo Aviazione di Marina, inveze no femo gnente!" — Ahh! Come dir che anca lori, anca questi che svolava a Pola, gavessi dovesto andar a Viena a butar bilietini? — Ma perché a Viena, che iera Austria? Se i gaveva de far anca lori una bravura, un sprezzo, una Beffa di Bucari, come, i doveva farghela in italia. E cussì i ga decidesto: Venezia. Siora Nina, iera sachi e sachi de 'sti bilietini, in zalo e nero, dove che iera scrito che anche noi risparmiamo questa Storica Città che già felicemente appartenne all'Impero e che siamo vignuti solo per far vedere che anca noi, quando che vogliamo veniamo. Scrito tuto in italian, se capisse e soto " Viva l'Austria! ", natural. — Ah go capì. questi che svolava, 'sti aviatori austriachi doveva andar svolando sora Venezia a butar ' sti bilietini. Una vendeta, come? — Vendeta? Nissun ghe fazeva del mal a nissun: una bravura. "Cosa solo che Danunzio! — zigava anca 'sto Bela Boka, la sera prima in Circolo dei Ufiziai dela marina de guera. Domani gliela faremo vedere nualtri!" Insoma, siora Nina, la matina dopo, in porto de Pola, là rente Scoglio Ulivi, tuti pareciadi 'sti aroplani, coi sachi de bilietini drento, i motori zà impizadi, che li gaveva impizadi Superina, bellissima giornada, e Bela Boka no vien. — El se gaveva indormenzà? — Ma no indormenzà. De sera che el diseva: " domani gliela faremo vedere!" el gaveva bevù un fià massa, spacando i biceri per tera come che usava i Ungaresi. — Ahh! Imbriago. — El se ga roto una gamba vignindo zò per le scale de casa, imbriago ancora che el iera. Ma cossa volé, oramai iera tuti pronti e 'sto comandante Zebokin, vedendo Superina sul idrovolante de Bela Boka sentado de drio, el ghe ga dito: " Superina, si senti davanti, la piloti lei, e via con noi in Venedig! A Venezia!" — Mama mia! I xe andadi svolando a Venezia? — Sicuro, siora Nina. Andadi, butà i bilietini sora Venezia — che iera propio un spetacolo — che anca i ghe ga tirà de tera qualche canonada, e tornadi per ora de pranzo a Pola, tuti contenti. — Ah tornadi tuti. — Ma no: tuti contenti sì, ma no tuti tornadi. Mancava l'aroplan de Superina. Pensévese! I speta, i speta e Superina no vien. " Ma dov'è Superina? Ma chi ha visto Superina?" Che Ruzzier lo ga visto l'ultima volta propio sora Venezia ma che dopo el lo ga perso de vista, che chissà, forsi un'avarea del motor, forsi quele canonade, povero Superina.... — Morto a Venezia? — Machè morto a Venezia! Speté che conto, no! Passa tre giorni, che zà tuti parlava de medaia, co' de sera, sarà stà le sie de sera, che tuti 'sti ufiziai che svolava, i iera al Circolo Ufiziai che beveva, rrrrun, rrrrun, rrrrun, se senti rivar un aroplan sora Pola.... — Danunzio! — Ma no Danunzio! Superina! Iera Superina col suo velivolo che se ga calà in porto. El se cala in mar, i lo va a cior, presto i lo porta in 'sto Circolo Ufiziai, che iera anca l'Amiraglio Horthy e i ghe dimanda: " Cosa è successo, Superina?" " Cossa xe nato, Superina. Che come mai Superina si è intardigato tanto. Che i altri xe zà tornadi tre giorni fa de gaver butado i bilieti su Venezia! " " Butado? — ga dito Superina — come butado i bilieti? Mi son andado casa per casa, porton per porton a meterli nele cassete dele letere!" Ve go dito, siora Nina, Superina, bravissimo motorista, fio de un postier de Fiume el ve iera. |
|
This page compliments of Marisa Ciceran Created: Thursday, June
19, 2008; Last Updated:
Saturday, July 05, 2008 |