Četvrtak, 1.12.2005.

Rubrika: Beseda

English

Blagdani su pred vrateh
Mikula vaje prihaja

Veselite se dečina, Mikula vaje prihaja. Puni vele črjene vreći, zlaton opšivene. Čuda igrački va njih je pospravno. Se vreći oprti i gre od kući do kući. Po pisme ko je dobil zna ča kade pustit i kemu. A dečine je čuda. Tu noć se nadela, ma sakemu pusti neš. Va škornjicu, va obešenu kalcetu, al pak na pijat na poneštre.

Se te štorije od Mikuli spamete me na ono vreme kada nisan mogla zaspat od veseja da ću neš nać od slašćic, aš za igračke onput Mikula ni imel čuda beči. Ma kašnje kada se našal kakov domino, al »čovječe ne ljuti se« veseje je bilo poduplano. Smeh mi se fermal na obraze, aš mi još vavek diši ondašnja naranča, v usteh se topi štolver.

Današnji Mikula je na čude, aš deca imaju sačesa i malo se ki nečemu veseli. Moji sini su judi ki delaju, ma se Mikula još vavek rada poferma pul naše kući. Za njih i njihe divojki pusti kakovu pikolecu. To mu je gušt, aš ta deca se znaju veselit. Va blaženen sne dočekat ćete Mikulu. Budite zadovojni z onen ča van prnese, pa magar to bil jedan bunbon.

M. Česen
© Copyright 2005 NOVI LIST d.d. Sva prava pridržana.

Main Menu