line_gbg70.gif (2214 bytes)

Čakavski - Ciacavo - Chakavian
Endangered Languages
line_gbg70.gif (2214 bytes)

 

Pokle Božića, još malo i finjuje 2005., pa ćemo zajist prvi kus Novega leta

Sokratova štorija z verun va boje jutra

Tiha j' noć. Zimjiva i snežna. Čoveku va takovoj noće čuda tega prihaja namisal. A ki put je dobro i storit račun za videt ča nan to rabi a ča ne...

Čoveku tako malo za sreću treba – okrunjeni opatijski krizbani

Tiha noć... Tiha i snežna. Vane se pletu pršak i vetar, a zima ujida.

Lumini gore i svetla na oltareh. Otajstveno se ruki sklapaju. Teče Božja šetemana.

Otajstvena noć podarila nan Sina začetega po Duhe Sveten. Otrok, rojen va Božiće, sobun je prnesal i Božju jubav. Sakemu sledić.

Bože moj, neka Ti ne budu preteški grehi naši i oprosti nan se one bedastoće ke storimo va neukoste svojoj. Navadi nas volet. Onputa ćemo, takovi kakovi smo, bit sled boji i svojen i tujen. Pokaži nan svetlobu va koj počiva mir naš sakidajni i pomori da najdemo sami sebe. Podaj nan ruku da ne pademo saki put pod križon živjenja, i mi ćemo svoju podat onen do sebe, i tako splest kolo okol Tebe za vjeke vjekova.

Tiha j' noć. Zimjiva i snežna. Čoveku va takovoj noće čuda tega prihaja namisal. A ki put je dobro i storit račun za videt ča nan to rabi a ča ne?!

Jena takova štorija čuda mi j' puti pomogla, pa ću van ju povedet, a dogodila se starogrčkemu filozofu Sokratu. Sokrat je živel od 469. do 399. leta prej naše eri, a umrl je od otrova kega j' moral popit kad su ga optužili da kvari mladež i da ne veruje va državni bogi.

Jedanput da j' Sokrat stal pred krcaten bankon na ken je bilo posloženo more stvari za prodat. Stal je i gledal, gledal i premešćal se, pa opeta gledal... Potle nekega vremena lih da j' rekal: »Bože, Bože, koliko je tu stvari, ke mi nanke ne rabe!«

Tega se saki put domislin dokle gledan izlogi. Nutreh sega i sačesa... a čoveku tako malo treba!

Na stole se studi friška pogača. Teplo diši kuhano vino s garofulići.

Pod krizbanon va jaslicah smeje se Isusić. Jas se smejen belemu kruhu i novemu letu. Jutra j' petak, pa subota, a onputa ćemo zajist prvi kus Novega leta. A va Novo rabi poć z miron va duše i z verun va boje jutra!

Cvjetana MILETIĆ
Četvrtak, 29.12.2005.
© 2005 NOVI LIST


Main Menu


Created: Thursday, December 29, 2005; Last updated: Saturday, December 12, 2015
Copyright © 1998 IstriaNet.org, USA